დიდი დიღმიდან დაგვირეკეს. ულამაზესი ქართული, ასაკოვანი ნაგაზია მიტოვებული და იქნებ უშველოთო. წავედით , ზარის ავტორი ქალბატონი ნინო დაგვხვდა და გვაჩვენა ძაღლი. თან მოგვიყვა ამ ძაღლის ისტორია: -10 წელი ერთ ოჯახს ერთგულად ემსახურებოდა. სიბერეში მუხლში ძალა წაერთვა და ამის გამო პატრონმა ერთ-ერთ მშენებლობაზე , საქმიან ეზოში დატოვა. სადაც მხოლოდ ქალბატონი ნინო ზრუნავდა ამ ძაღლზე, მაგრამ საქმიან ეზოს მეპატრონე იმუქრებოდა მოაშორეთ აქედან , თორემ მოვკლავთო. სწორედ ეს იყო მიზეზი იმისა, რომ მივედით ადგილზე და ძაღლი გადმოვიყვანეთ ჩვენთან თავშესაფარში. მაგდანას ლურჯასი არ იყოს , სანამ ჯანი ქონდა მანამდე გამოიყენეს ძაღლი, დაუძლურდა და მიატოვეს. დღეიდან ძაღლს ლურჯა დავარქვით , თავშესაფარის ლურჯა.
